மக்களால் வெறுத்து வீசப்பட்ட மத்திய சர்க்கார் அமைச்சர் சந்தானத்தை, விந்நியப் பிரதேச கவர்னராக ஆக்கிய பற்றி கண்டித்தோமல்லவா? இதே கண்டனத்தை எழுப்பியிருக்கிறார்கள், புது டில்லியில்.

இந்தியப் பிரதமரை, பத்திரிகை நிருபர்கள், கேட்டிருக்கிறார்கள், ‘தோற்கடிக்கப்பட்டவர்கள், கவர்னராகலாமா? என்று அதற்குப் பண்டிதர் பதிலளித்திருக்கிறார் – ஜனநாயக உலகைக் கேலி செய்வது போல்!

‘மந்திரியாக இருந்தாலென்ன, மதியூகியாக இருந்தாலென்ன, மக்களை மதியா உன்னை நாங்களும் மதியோம்“ என்று, மாயூரம் தொகுதி லட்சக்கணக்கான மக்கள், முடிவு கூறினார்கள் – தேர்தலின்போது.

அந்த முடிவை, அவமதிக்கிறார் நேரு! முடிவு தந்த லட்சக்கணக்கான வோட்டர்கள் – யாரோ சிலராம் – செப்புகிறார். ஆசிய ஜோதி. “சென்னையிலுள்ள சில வாக்காளர்களால் அவர் தேரந்தெடுக்கப்பட்வில்லையென்பதற்காக, அவருடைய சேவையையா – இழப்பது,“ – என்று கூறியிருக்கிறார். ரயில்வே இலாகாவில் அருமையாக வேலை செய்தாராம், சந்தானம் – கூறுகிறார் நேரு. என்ன அருமையோ அது – நமக்கெல்லாம் தெரியாதது – நாட்டின் பிரதமருக்குத் தெரிகிறது! ரயில்வே இலாகா முழுமையைம் ‘நாமதாரி‘களாக ஆக்கிய தவிர, எந்த ‘அருமை‘யையும் காணவில்லை நாம் – ஆனால், முடிசூடா மாணிக்கம் கூறுகிறார்!

சந்தானத்தைப் பாராட்டிவிட்டுப் போகட்டும் – ஆட்சேபமில்லை நமக்கு. ஆனால் அவரைத் தேர்ந்தெடுக்காமல் விரட்டிய மக்களை அவமதிக்கிறார் – ஜனநாயத் தேர்தலை, அலட்சியமாகக் கருதுகிறார். நண்பருக்காக, நாவு, இவ்வளவு வேகமாக அசைவதா ஒரு பிரதமருக்கு? சிலராம் சிலர்! “Some electros in Madras” நேரு, கூறுகிறார் இப்படி! சந்தானத்தை வெறுத்து வீசிய மக்கள் தீர்ப்பைவிட, தனது தீர்ப்பே மேலென்கிறார் – ஜனநாயகம் பற்றிப் பேசும் காந்தீய வாரிசு கூறுகிறது. இவ்விதம்! தலைமைப்பதவி, இத்தகைய நெஞ்சுரத்தைத் தராது – இவருக்கு என எண்ணினோம் – ஆனால் சராசரி நிலையையும் தாண்டிவிட்டார்! “வேண்டியோருக்கு ஏற்படும் இழிவு“ காண, ஏனோதானோக்கள், குதிக்கலாம் – குளறலாம் – கொந்தளிப்போடு பேசலாம். ஆனால் இவரா பேசுவது? நேருவா! - ஜனநாயகம் பேசும் நேருவா!

திராவிட நாடு – 9-3-52